Dal uèc' al nov an da li nosi tradizuu

[Luisa]

Dal uèc’ al növ, an da li nosi tradizüu d’Abriga

S’al füs da fa’ an quadar par descrif l’ambiènt da quèl tep, (agn.40),
a caual da l’an uéc’ a quél növ, fares ina grand querta bianca,
ca quercia giò tüt atòran, cun quach elèmènt scià e là pietrificàt.
Sglasc’ e sglacsioc’ ,cuma la ual e li funtani da paré cani d’ organ.
An mez a sta sglascera, poca get ca brigula da ina stala a ina stüa,
par salvas dal frèc’, tignit cünt che al vestiari d’ nos dì, l’era amò da là a uignì.
Tüt fermu da stu tep! La scòla, la campagna e ogni tipu da laurà,
a ecezüu dal bes-ciam, dumà e sera, da regulà.
I om turnac’ dai cantier, nu i gaua che da gòt al guadagnat pusà.
Quasi ferma a la spesa, tignit cùnt che la get l’aua fac’ scorta,
da quat i aua ramt scià, an dal sumarti, da la so tera.
Da fam i muriua miga;
li patati era an dal trés, li lüganaghi tacadi sü an dal cambrel,
al cunscià an da la scegia e cun i furmai (chi ca gaua uachi) an da l’ambòlt,
li brasciadèli dal pa’ a lòrt ‘nfiladi e tacadi sü .
A purtada da mà al disnà dal dì, l’era patati tondi e os da purscèl,
e al dulsci, miga al panetù, ma l’era li belagoti,
‘ntat che li castagni,sü an da la grà, a Liscet, li finia da secà.
A la fì, par miga sprufundà cun al risciu da cunfondas cu ina statua gelada,
gh’er al TE Deum cantat, cun tüt al fiat pusibil, an da la pür frègia Gesa.
Ina paruènza da velgliù al gh’era pür, ma sòl pa i sciòri, a l’Albergu Aprica (o Ferazzi),
an ghe che li sureli Della Patrona li sa meteua sü la pòrta a ufìrì cinq cm da nastru triculor, an cambiu d’ina uferta ca li duperaua par finanzà li trasferti a li gari, di nos prim –campiù – da scii, d’Abriga.
E auanti da an in an, cun li grandi evuluzüu, sòta ogni aspet, di nos di.
Auguri da finil be’, l’an e da ‘ncumencial sèmpar mei.
Luisa Moraschinelli/ Aprica 2010-2011

[Ezio]

Cara Lüisa, cun vegliù u sensa vegliù àuguri a tüc da finil be’ l’an e da ‘ncumencial sèmpar mei. Eziu

[Stentaröl]

Auguri a tüc, par an an bun, miga trop gras né màgar, miga trop frèc gnà cold!
Stent