Ina posa e an pas da memoria an-dre da 70 agn. al mè paes

[Luisa]

Ina pòsa e an pas da memoria an-dre da 70 agn , al mè paes

An s’e an di agn 40, sü par gió;
écu al mè paes, l’Abriga cun li söi cuntradi;
l’üuna stacada da lötra, faci da rusciöi da ca’
ca li par ilò an da la manera, an cas da pericul,
da das ina mà, da brasas scià.
Ae cinq püu úna, ch’al sares Mauigna u Albergu ,
facia da moderni ca’, uili e alberghi,
an custruzüu moderni ca li ga niènt a che uedé,
cun li cuntradi, dal tep, faci da ca’ uégi,
tanti a’ cun stala e masu’ tacadi.
Lisced l’e la prima contrada giò an méz ai arbui.
Liscidì la segonda, dopu ina bèla sgambada:
Abriga u st.Maria, la terza, dopu inòtra caminada,
forsi la pù pupulada. cun an testa la so gesa
ca fa a’ Parocchia, ciamada St. Maria.
Dòtra strada da fa, par riuà sül pià,
cun Mauigna, la banda muderna.
Su la sinistra, a sulif, la contrada Dos
e pasat ià al bèl pià, ‘taiat dal stradu’ afiancat da paracar,
l’ultima contrada, St Pieru,
cum la so uègia gesa ca fa Parocchia a li cuntradi atóran.
Ca uégi faci da sass. Uarguni cun stala e masù tacat.
La famiglia, amó unida, dai regior ai tzetasc a ruscioi,
i ga al so da fa par truà da durmì e al minim da mangià.
E furtunac chi ca ga stala cun uachi, cabri, peuri e al purscel .
par sta al cólt e uèch asé da sfamas.
I tztasc i uàa a scöla, ma sol fin a la quinta elementare.
Pü auanti le sol privilegio da pochi famigli sciori.
par al rest i seruis par idà a purtà auanti la famiglia;
an di cap, an di prac’ e ‘ndà, cun al gerlati. par légna,
e an tep da ghislù e mani, a ramàn scià, e purtai, a la sera, al Cué
par fini , cun al camiu Plozza-Triaca, al da là dal cunfì.
Uita grama an cunfron ai tep da uigni!
Gh’e miga paragù cun al be da sti dì.
ma da tignì cünt,(e an parla par esperienza),
la uita l’e sempar supurtabil an ogni situazüu.
Basta fidas dal Signor e tirà auanti di par dì,
sü “La strda da la uita”
Luisa Moraschinelli/Abriga dicembar 2013