La setimana Santa da ier e d'an cö

[Luisa]

La setimana santa d’an cö e di ier.

La Quaresima l’e pasada i-à,
cun an digiü par al poch, ilóra
e dumentegàt, an cö par al trop ch’an gh’à..
La ndumènaga da li palmi,
la pórta an pö d’alegria da scascià al rimors
dal miga fac’.
Chi ca sa’ che al rèst da l’ulivo al ué brüsat a part?
la scendar, pasada al creuèl, l’e mèsa i-à ;
la ué buna al di da li ceneri da l’an a-dré.
Lünedì e martedî Sant?
L’era par netà tè e fo da li ca’, stradi compresi.
Al merculdì, an gesa, uers sera par l’ufizi;
cun an bacan da tzetasc’ , an di banch, par regurdà i suldac’,
riuac’ an dal Getzemani a ciapà al Signor.
Giuedì, al grand dì da l’Eucaristia.
Mesa granda a la dumà cun li campani, al Gloria,
ca li sona a l’ingranda e-pu li tas fin al sabat Sant.
Al uendardi sant, aria da sulènch a regurdà la mort dal Signor.
Par li stradi i strampelà da la “creula ?” al post da li campani.
I altar spogli, e la deuzüu tüta par al Sepolcro che a la sera,
i la porta an prucesüu cun li cunfraterniti, an divisa da fèsta;
finestri e stradi decuradi, da priuac’, cuma i pudeua.
Finalment al Sabat Sant cun grandi funzüu.
Al Gloria , an scampanelà da campani e campanéli,
a regurdà ch’al cumencia la fèsta.
Li mateli, a li funtani u a la ual a lüstrà al ram,
e netà da fi an da li ca’.
I om, uignic’ dal laurà da fo, netac’ e lüstrac’,
‘ndirizzac’ , da li söi fömni an gesa a cunfesas.
La Pasqua la riua a la ndumènaga,
cun la so aria da primavera e da ca’ e stradi lüstri.
Al disnà da Pasqua? da pochi purtadi (ilora):
pizzocar u, tat par cambià , pulènta e lüganaghi,
prezios rest dal póor purscel ,
macelat an ca’ an dal tep da denedal.
Al puntu culminant e da tüc’ speciat, al dopumisdi,
cun la binidizüu da li ca (ilora)
Al preuat an cota e stola ,al ceregh ca porta l’acqua santa,
e l’aspersori par binidì e al monach cun al cauagn,
par met i tre öf: uferta da diuit, tra al Preuat e al mönach.
Da ca’ an ca’, cun la benedizüu, ina buna parola ai uèc,
üna ai tzetasc, prima da sera i faua tüta la contrada.

Cun quest al finiua a’ la Setimana Santa.
E nó, an sa socia cun an regórd d’ilora e an auguri d’an cö a tüc,
da BUNA PASQUA
Luisa Moraschinelli/ Pasqua 2012.