La me cuntrada da li ca öidi

[Luisa]

La me contrada da li ca’ öidi

Par casu al ma capita par ma’ an toch da giurnal,
da la foto dal fónd da la mè contrada d’abriga,
cun al centru la rüspa ca pórta i-à al material da la ca’ dal póor Pineli,
a quantu par, sènsa u-è truat al storich lauèc’ di marènch d’or.
Uardi li ca’ atóran, pür amò an bu’ statu, ma öidi da li grandi famigli ,
che ilò i staua cun ruscioi da tzetasc’ e da uachi pieni li stali.
Ca’ öidi cuma quèla an vista di – treboc’, gna tat uègia (1909),
cun doi famigli an piena atività an di agn 40;
quèla dal ziu Cuè, cun ina famea da trei spusi e da la stala be’ furnida,
che, ai tep, l’era sègn da beneser.
Om al ziu Cuè che, a tep pers, al sa daua da fa a mèt tè brochi e sciauac’a sulà.
L’ótra metà da la ca’, la surèla, la Cia cun grand famea, (mi compresa)
Ca’da la grand vitalità e an cò öida a’ se da proprietà, uarda casu,
se pür fiöl dal ziu Cuè, l’ ültim discendent dal ormai famos, por Pinèli.
Sèmpar da la foto, be an uista, la ca’ di Bindoc’.
Grand famiglia a’ questa da la stala piena (segn da benesser)
ma a’ le öida da tat tep a se la grand famiglia la truàt ca’ an sü, an dal pià.
Pü misera la ca da la poóra Slita morta sènsa fa rumor, già dai tep.
Amò intata, cuma an palaz la ca’ metà dal Cucoia, ma ciamada : - ca dal Ré.
Ma a le ilô öida da tat tep, a se la so get la sta ilò a du pé.
Sol da spüs la ca’ dal Losa. Graziosa ai tep par li bèli mateli che ilò li uiueua.
Urmai distrücia a’ la ca’ di Burì.
E che…… an sa ferma cun an pensier da tristezza a pensà;
quac’ da quèla uiua generazüu an se che a cüntas?

Luisa Moraschinelli /Da Poschiavo 19/2/2012
(foto, La Provincia 19.01.2012