Quandu ai fünürai i daua fo la sàl

[Luisa]

Quandu ai fünürai i daua fo la sàl

Üna da li nosi tradizüu (an abriga) da tep sparida,
ma a’pasada ià an da la nosa memoria storica,
l’e stacia quèla da da’ fo la sal ai funürai.
Già! Ca cèntral la sal cun al mort, cun al funüral?
Sigüramènt quèla üsansa la uigniua ià da tep luntà,
quandu la sal l’era an be’ prezios e scart,
tat da uès inserit a’ an dal cuntraband.
E parché dacia fo propri ai fünürai.
Niènt a che uedé cun riti propiziatori,
ma semplicemènt ina manera da ricunuscenza a la get,
ca partecipaua al dulör da quèla famiglia.
La distribuzüu la uignia facia amò da dit dal Campusànt,
a la fi da la cerimonia.
Par solit l’era üna u dói personi da la famiglia dal mort,
ca sa meteua da dit dal cancèl dal cimiteri.
Ilò d’an sach grand i tiraua sü ina scüdèla da lègn,
piena da sal grosa e par solit i ga la meteua an dal scusal da mez, che li nosi mami li ultaua sü.
La sal l’era miga dacia fo, indiuiduamènt, ma par famiglia .
Tat par di’ fin a quandu l’e ‘ndacia sta’ üsansa,
mi la regordi, par l’ültima ólta, al funüral da l’Ani di Bozzi,
(prima fómna dal Giuanì da l’agrgagn, 1935-40?)
Da nutà al bu sensu da la nosa get da quii tep:
miga fiór ch’i uà be’ a i nos dì, ma miga an di agn magar,
(che pu i fa’ be’ gne al morc’ gne al uif),
ma ina buna scüdèla da sal che, par la so scarsità,
la idaua a lé, a’ tirà là.
Luisa Moraschinelli/Lugano, 19.10.2010