La fera da Sampieru, an Abriga, ier e an co'

[Luisa]

La fera da Sanpieru an Abriga, ier e an cö

La fera da Sampieru an Abriga,
che dai tep pan ‘ndré, l’e sèmpar al uintinöf da giügn,
an da l’era contadina (agn 40 ca)
l’era quasi ünica an Abriga,
a ecezüu da la Madona da óst an da la contrada da l’Assunta,
pü mudresta e cun la caratteristica dal tradiziunal
“incanto di canestri” ch’as fa amò ai nos di.
Ma la fera da Sampieru l’era suvrana,
e da granda importanza, tignit cünt che an paes,
gh’era miga d’otri pusibilità da fa compri extra,
da quili da strecia necessità.
La Gesa l’era al centru cun Mésa basa,
Mesa granda, cun l’organ ,e al Uespul.
La get ca uignia da li cuntradi
la sa fermaua ilò an di paragi, par tüta la giurnada.
I pù an forsa i sa sentaua sü la teraza dal Albergu Alpi,
ilora da grand lüsu.
Cumerciant e get interesac’ a uént e comprà i uaua,
a l’usteria da l’Ursulina ,cun atóran bes-ciam da ogni gener,
cumpres i purscei da niada, ch’i cumpraua da leuà par fa sü a denedal.
Li famigli cun tanc’ tzetasc’ li sa sentaua a fa’ marènda ilò atoran an di prac’.
L’era a’ l’ucasü par comprà rastei, fólsc’ gerli e campac’,
ma a’ l’ünich per da scarpi, scicupei, u da lüsu, i cumù sciauac’.
E par i tzetasc’ l’ünica ucasüu da uèch an uintì da spent a vuluntà.
Che da fa a pasà d’an banchèt a l’ótar par compra la pipa dolscia u ,
la trumbeta, u al s-ciùpitì?
An cö la fera l’è an cumü mercat quasi setimanal.
Ma be i fa’” i agricoltori” a fala so festa ,tignit cünt che i tep ae cambiac’;
uachi, cabri, peuri e d’otar animai ,che ai tep era an ogni famiglia u quasi,
ai non dì l’e la rarità da fa cugnós a la nöua generazùu e a quii ca ué da la cità.

Luisa Moraschinelli Aprica/ Sampieru 2010