al nos dialèt - La stagiuu l'e finida -

[Luisa]

Al mos dialét
La stagiuu l’e finida
Che la stagiüu la sia finida a’ an dal nos paes d’abriga,
al gh’é miga bisogn da uardà sül calendari,
ma m’al uét da par tüt, a’ an da li stradi,
liberi da machini e da get. ‘ndafarada..
Cun la fi’ d’aóst tüt al rientra an da la nurmalità;
i turisti e ‘ndac’ i pü, i ótar ae an pé d’andà,
li persiani ae seradi, i parcheggi óic’
e a’ la get dal paes la s’a da’ pas.
La stagiü l’e par tuc’ ‘npegnativa,
e be la sia, as-disares - an se che par quèst -,
e a uardas an d ré, ne di’ che a’ an da stagiüu pasada,
nigü i s’a s’e risparmiac’.
Tüuc’ ‘mpegnac’: i cumercianc’ an dal so laurà,
i esercenc’ a sudifà i bisogn da la get,
quii ‘npegnac an dal social e turismu,
a ‘nventà e fa’ da tüt pa sudisfa e divertì la get.
A stu scopu i-à tirat an scena a’ al bes-ciam,
a’ sa l’e propri póch, tra uachi , e a’ i órs,
se nun ótar a regurdà ch’i gh’e a' lor a reminiscenza d’an pasat
quando al bes-ciam l’era ‘ndispensabil par al uiv da la get.
E, par tirà li somi, an pensier al uà a’ al Sindach (u sindachèsa?)
che l’e sèmpar stacia presènt a ogni manifestazüu,
a regurdà che al Sindach al stà be’ di front al turista,
ma a’ cun la so get da ca’.
Luisa Moraschinelli