uinticinq da brill - Liberazüu -

[Luisa]

Uinticinq da bril (25 aprile liberazione)

Ogni ann al n’a riua ün da uinticinqu da bril,
ma an da la memoria da quii ca gh’era (e an s’è sèmpar menu)
quèl dal milanöfcènquarantacinq
l’e restat memurabil par tanc’ mutif,
a liuèl dal paes, ma a’ da la storia an general.
Persunalmènt, al prim ricordu, an quel clima esplusif,
l’e da camiunèti ca giraua, sül stradu’,
ma a’ an da li cuntradi pieni da matei cun diuisi da l’aria americana.
impruisac’ tüc partigiani,
(a’ se a tignì a bada tudèsch e fascisti, sül Murtiröl, era menu da quel ch’as pensaua)
cun al fular triculor al col, ’i cantaua e gesticulaua,
a mubilità matèli da purtà a fa festa a Tirà, a Sondri,
e magari, ai grand incontri, a’ a Milà.
Dumandi ca lii uaua a öit, tignit cünt che,
l’emancipazüu l’era gnamó riuada a quèl puntu.
A’ se i partigià, a la fin fi era gioagn dal nos paes,
inütil l’era a’ al pregà li mami da lagali ‘ndà,
a quèla festa da regurdà par tüta la uita.
An quèla circostanza, la parola d’ordin l’era - liberazuu –.
Ugnün i la uiueua a segónd a la so manera, sia an famiglia che an società.
Persunalmènt l’eri sintetizzada an tre punti ritignic’,
da grand importanza par al nos uif:
1) libertà da pudé cumprà al pà segond al bisogn.
(non più carte anonarie)
2) libertà da durmi tranquii an dal so lèc’
(basta rumör da aerei cun bombi sü i nos ciel)
3) libertà da cercä al laurà an ghe ch’al gh’é
(non piu’ frontiere chiuse, specialmente per i fratelli maschi).
A pensach be’ l’era miga gna póch sta idea da liberazüu,
tignit cünt che, pü u menu, la düra amó ai nos dì dopu sesantaciq agn.
Luisa Moraschinelli/25.aprile 2010