al nos dialèt - a Eluana

[Luisa]

A Eluana

“finalment” Eluana l’e morta!
e quandu menu i sa l’aspeciaua.

La parola “finalment” l’e miga quèla giüsta,
ma tignit cünt da la situazüu tragica,
ch’al ga s’era creat atóran,
strapada da la so pür serena situazüu,
an ghe ca la pudeua specià al so tep segnàt.

Par mutiui a nó inspiegabil, da chi ca sta da sóra.
se al ciel u chi par lü, ià mès ina ma’ an anticipu,
par miga fala riuà a la fi ch’i gaua destinat,
al sares amò al minim mal.

Erala miga già stacia decisa la sentenza?

Pazienza se, riuac’ a l’estremu da la cumpasü,
dopu dezzèt agn an quèl statu,
i es decis da scürtach la uita,
i pudeua fal a’ prima, sènsa tat budesc’.

Ma decis da fala muri da fam e set,
e chisà quat al sares ‘ndacia auanti,
propi gh’e miga resù ca tegn.
E ilora? Nigü i sa’ cuma, impruisamènt,
l’ha pensat da tö al disturbu,
e lagà tüc’ da stüch, prima dal tep di ótar, segnàt.

Se pür an da la tragedia,
an sa augura ca la sia ‘ndacia an sci.
Che al ciel l’abi uardat gio,
e dac’ a Eluana quel premi che sigür la s’e meritada,
an da sta uita an mèz a om ca pensa
da pudè decid da la uita di ótar.

E pensà che tüc’ al par i abi agit par amor:

li suori misericordini che sigürament, (e an à miga dübi)
se miga slungat la uita, i ga la rendüda menu penosa;
al so papà ca l’ha fac’ al diau a sèt, pür da riuà, legalmèn?, a fala finida,
cunvint ca l’era già morta al mument da l’incidènt;
la clinica ca l’ha fac’ al sforz da uspitala, par fala murì prima;
chi ch’a decretat da dach al colp da grazia
cun al decit da fala murì da fam e da set;
i parlamentari che i s’e dac’ da fa,
par serà la porta da la stala, quando i bó era giä da fo.

A’ nó, che, a quèl puntu, pitost che immaginala a murì da fam,
an se augurat c’hal sucedes uargòt da ciamala prima,
an quel ciel an ghe che sigüramènt l’ha truat”finalmènt” pas.
Luisa Moraschinelli (pubblicata su AlerNativa,( marzo 2009)