La Setimana Santa agn 40

[Luisa]

La setimana santa agn 40

Pasat ià al dì da li Palmi, cun la distribuzüu da l’ulivo
l’atmusfera la sfaua quieda, quieda.
Al merculdì, an gesa, i tzetasc´ i pèstaua i pé sü i banch,
a regurdà i suldac´ch’i riuaua an dal Getzemani.
Al giuedì, dì da l’Eucaristia, al Gloria, i sunaua a l’ingranda campani e campanei.
I purtaua al Santisum an d’an altar lateral e spugliat l’altar magior, i lagaua uert al tabernacul.
Quèl dì l’era dedicat a l’Eucaristia e chi ca pudeua, i faua l’óra d’adurazüu.
Par li stradi, par ciamà la get an gesa, i sunaua la “tarantula”.
Al uendardì Sant, nient Mesa. A li trei i regurdaua la mort dal Signor
e i faua adurazüu dauanti al Sepolcru, preparat par la Prucesüu da la sera.
A la sera Prucesüu par li stradi da li cuntradi, cun al Cristo Mort.
Li stradi e li cà era adubadi, cuma i pudeua: querti ricamadi, tapec´, tuai, candeli e sègn da la Pasüu, magari ritai da carta, sü i uedar da li finestri.
Al Sabat Sant, an gesa a bun’ora.
Da fo i piaua al föch e i la benediua. A gesa, al scür, al preuat al purtaua dit la lüs cun ina candela ca piaua tüti quili an mà a la get.
A quèl punto al cumenciaua la longa funzüu cun:
letüri da Storia Sacra, binidizüu da l’Acqua Santa, e, finalmènt, la Mesa.
Al Gloria l’era ina esplusüu da campani e campanèli.
L’aria da grand festa, las diramaua an da l’aria, an da li cà e an da l’anum da la get.
An settimana li mateli i aua lüstrat tüt, an da li cà e fo par li stradi;
a’ i più restii, i sa s’era cunfesac´par rispetà al precèt e la ´ndumènaga da Pasqua, l’atmusfera an dal paes l’era al cumplet; propri – ina Pasqua –
Al disnà, a se da <poor diau> l’aua da uès al masim, par quii tep.
Al dopo missdì, tüc´an cà a specià al preuat, cun al mònach, ch’al purtaua al cauagn par met i tre öf, ch’i daua cuma ufèrta, i ceragh, cun la cota, i purtaua al sidilì cun l’acqua Santa e l’aspersori par binidì la cà e la famiglia, a pregà, ramada scià.


Quèla l’era la nosa Pasqua d’ilòra.
Buna Pasqua a tüc´par quèla d’an cö.
Luisa Moraschinelli/Pasqua 2008