[Luisa]

Bosch abandunàt (in risposta a “Bosco abbandonato)

Car al mè bo-sch!
S’al pudes parlà al disares:
"beat i tep ch’i uiuea an da la miseria."
Se miga propi da lüciach sóra,
quandu cun al gerlatì dopu la scöla, già da pisciagn,
scimat sü prac’ e cap, an uaua sü an dal bosch,
e an ramaua sü tüt quèl ca l’era legna,
fin ai sci-sciö prezios par uià-là al föch.
E li nosi mami a ramà patüsc’ da fa’ söt lèc’ an da li stali.
Tüt l’era bu’, da l’erba sèca a li foi che specialmènt al sumartì,
li crudaua giò da li pianti da ogni gener cumpres la bega di pèsc’.
Ilöra séééé… che al bosch l’era nèt!
E sènsa legi u consigli, ma dré a la spinta da la necessità.
E al bosch al cuntracambiaua cun li söi beli piantini da ghislù,
ch’am ramaua scià e miga par fa’ marmeladi ,
ma da purtà al post fisat, che pesac’ e cuntrulac’, i-à pagaua e i-à purtaua da là dal cunfì.
e tüt al idaua a tirà a campà.
Ma i nos bosch era generös an tati maneri:
cun fonch, manini, scirisì, mani, móri e d’otar. Fin a li rais dolsci.
Gh’era gna bisogn da segnà i sinter;
era sèmpar nec’ e batuc’ e la visual da ina pianta a l’otra,
da ina montagna a la ual, l’era ciara.
Che pena al di d’an cö a uardas atóran!!
E par uedé sta brüteza an ga miga bisogn d’andà luntà;
gne sü eurs la Magnolta gne gio al Sant, (u zapei d’abriga)
ma pür comuc’ sentac’ sü la curiera, an transit,
an sa trua dauanti a stu trist spetacul,
da bosch ca sbogia fo da par tüt.
‘nvucà la miseria e necessità di tep pasac’?
U rasegnac’ a tignì quèl ca m’à creat e abandunat?
Luisa Moraschinelli/Lugano aprile 2011