[Luisa]

Uintisèt da ginér, dì da la memoria.
Al uintisèt da giner , an particolar, da des agn an scià,
as regórda la trista storia di ebrei, da l’ultima guera,
depurtac’ an Germania e finic’ an di fóragn crematori.
An da sta storia d'ebrei, an g’à a’ nó, an abriga,
se pür a fi pü furtunac’, da cüntà e regurdà.
M’ai ciamaua “zagabri” par la so prueniènza da Zagabria.
L’era i agn 1942 ca. quandu an Italia,
la persecuzüu, l’era gnamó decretada.
Famigli sistemadi an di alberghi e ca’ priuadi d’abriga.
Rrestac’, pü u menu, an per d’agn.
Get ch’à miga dac’ problemi e an general,
a’tratac’ bé da la get dal post.
Al giraua ós ch’i g’aua a li spali ina solida urganizzazü.
Ch’al ga füs da mèz – l’uomo bianco – che da Roma al pensaua a lör.
Da sigür gh’era don Carozzi, an preuat da la Motta.
Lü, da piach e da pales, al ga staua drè.
Riuàt al mumènt dal pericul,
al sarà lü, cun al don Cirillo, al preuat da la Brata,
sènsa preauis, ina sera, a fa pianàt ilò tüt,
e guidac’ ,d’abriga al pià e pu sü, sèmpar a pè, uers la Brata e al di a dré, auanti fin al cunfì Svizzer, al sigür.
An di agn, an be’ e an mal s’e parlàt, ma da pusitiv al gh’e,
che an Svizzera i sa s’e salvac’ tüc’.
La prua? an da sti ültim tep,
da li ricerchi dal prof. Alan Poletti,
(uilasch d’urigin, ma an Nuova Zelanda da ca’)
che l’ha furnit li prui e pü da ün, ae a’ turnac’,
a riued` i pos-c`da quèla so trista storia, an abriga.
a’ se finida be, an cunfront a quii da la “memoria”
ch’an regorda al uintisèt da giner
Luisa Moraschinelli
(üna ca gh’era ai tep e an cö)