[Luisa]

M Ü D À (la transumanza)

An dal “prugram” da la nosa fì’ stagiüu d’Abriga,
an trua la - la transumanza – che an brigasch s’antènd: - al müdà –
Ina simpatica nuità ai nos dì, ma üsüala ai tep, da l’era contadina,
quando tüc’ ,u quasi, i gh’au bes-ciam.
A be’ pensà li uachi dal nos paes era – sciöri - rispet a quili dal pià;
‘npegnadi a tirà l’aradel an dal cap e al car, par li stradi.
Li nosi d’Abriga, d’anvera li staua comudi an da li stali dal paes,
a furnì al cólt, par fa pasà la longa ‘nveran a la so get.
Scià la primavera i-à purtaua sü i magènch da cà:
Fopi, Brati, Corna, Ciuderi, Lischi, Bonii e d’ótri atóran,
Finalmént an da la tarda primavera al – mùdà - an da la Ual (val Belviso)
I partiua an fila indiana: li uachi ca li ritmaua al pas, cun brönzi e ciochi,
guidadi dal pastor cun giaca da füstagn sü li spali, bastù an ma’
e la bisacia a tracol cun gio sal-negra da dach tè par tè a li uachi;
Al uignia dré purscei e cabri ca li uaua par so cünt.
Al cagnasc’ al cureua scià e là, ‘mpegnat a tigni scià uedei e mansöi.
Da dré la famea quasi al cumplet, tignit cünt che müdà an da la Ual,
l’impegnaua a stà tè di e noc’ e n’eua purtàs dré da che uif.
Par i tzetasc’ l’era l’andà an uilegiatüra, a’ se cun al so gerlatì,
cargac’ da quel ch’i pudeua purtà: brasciadèli da segal, farina da pulènta.
furmai, lüganaghi e salam par al cumpanadagh, sal bianca e negra.
Al rèst: lac’, büter , maschera, fónch, manini, pürüch, curtilì e d’ótar,
da fa’ scià cun la pulènta, i-à truaua sùl post.
Quasi niènt par cambias, tignit cünt ch’as durmia sül fé e girà a pé biót.
Mami e nöni u amadi , li tigna i tzetasc’ pisciagn par ma’ u tacac’ al scusal.
ma al pudeua a capità da purtà la cüna an dal gerlu u an dal campac’.
La - Ual - la cumprendeua: Balauerta, Magasc’, Gambuer, S. Paul,( cun la gisina), Cabrinai, Braghéc’,Giò da là, e auanti fin a Frera (sènsa la diga), al Prat,e sü a li Rais.
Scià l’estat, ma cun menu ritual, i purtaua li uachi a mut:
Palabiu, Magnölta, Magnöla, Nembra e Cap (par quii d’Abriga)
Pasat l’estat i müdaua a la stèsa manera an sènsu ‘nuers: dal mut a la Ual,
ai magench dal paes, e finalment, a li söi stali da ca’.
Le quèl ch’an uedarà, a’ se an forma minima e muderna,
sabat 28 da öst (2010), cun tat da pubblicità.
Luisa Moraschinelli/Aprica 15./08/2010
P.S. Stentaröl, a lei l’onore della traduzione???????