liscidì (Liscidini)
Liscidi, l’e la segónda contrada ch’an trua e da la sponda da scià da lisced. Cuma contrada an pensa ca la sia menu uègia da lisce; tüt al fa pensà che al so svilup al sia uignit ià cun la custruzüu dal stradù (1850-55). Al m’al fa pensà li doi bèli cä ca afianca la strada e la fa da purtal a l’abriga. Sia li cà già fo dal nurmal par quii tep, sia par al scutüm da – maistrì, tüt al fa pensà a get d’an certu gradu superior rispetu a la get dal tep.
Difati, da cuma i la cünta i ueuc` al capustipi l’era ün om da larghi uidüdi, già ecentrichi’ an dal uistit da gentilom da l’otcènt, al cumerciaua da la ualcamonica a l’abriga, a la granda.
Ma a liscidì, an di agn ’40 gh’an era a d’otri cà già da strutüra moderna: quela di tunagi, famiglia an ghe ca ,’e uignit fo la maèstra Della Moretta, ( üna culona an da la scöla e par la get par la so prestazüu da infermiera vuluntaria); quèla. di demianì, sü al sinter-strda ca culegaua liscidì cun l’abriga. (ch’à dac´ la prima centenaria d’abriga nel 2000, la Bitina).
Par al rèst, a’ la contrada da liscidì l’era facia da an rusciöl da cà da sas ramadi scià li üni ados a li oltri cun póch spazi da diuit fra an lucal scià e là, par la get e stali e masù par al bes-ciam.
Li famigli li sarà staci üna uintena. Cun quili già numinadi, i póm grand famiglia da grós cuntadì, ma ch’à dac´al – maestru -; al carlì da lôrb, guardia cascia, ch’à fac´la santèla an da la ual par grazia riceüda; i barbasc ‘ entrac´an üna da li cà di maistri e an ghe ch’âl gh’e stac´, par agn, li scöli da li cuntradi da la parochia Madona; ultima lucazüu prima da uès mèsi an sèma an dal nöf palaz (an ghe ca li gh’e amó an có). D’ótri famigli: i ro-rò, i uincì, la Nina, üna uedua ca cüraua la biancheria da la gesa, al ciót e d’órta ca sfüg a la mè memoria.
A’ liscidì, dopu la guèra la s’à s’e rinuada. La g’à miga büt al spupulamènt d’abriga. La gh’à la so strada e ormai al gh’e pü distansa fra liscidì e l’abriga.
©Luisa Moraschinelli/Lugano, 21/4/07
|