Ueramènt la fera da Pentecosti l’e a Tirà,
ma, al grand trafich al cumenciaua da nö,
la settimana prima e al finiua la setimanaa dré.

I prim a pasà l’era i scingagn cun li söi caruani.
I sa fermaua scià e là par li cuntradi
a uènt cianfrüsagli, a lèsc´ la mà
e a tignì an pensier li mami par la pura,
ch’i purtas i-à i tzetasc´.

Al di prima, i pasaua i curtanasch
cun al so biroc´a dói rödi e a dré
uachi e mansöi da uènt al la fera.
Quel ch’i faua i nos mercanc´ d’abriga,
ma a quach priuac´ ch’i speciaua l’ucasüu
par purtà a uènt la uaca u al uedèl.

An giurnada an grand budesc´d’abriga;
a bun’óra, a pè I sa uiaua gió giuinoc´ e mateli,
e an grand alegria, sintit la Mesa an dal Santuari,
i pasaua la giurnada tra giostri a smurusà,
e scupri, dal mónd, li nuità.

A la sera idem, cun al grand muimènt sül stradù;
i curtanasch cun al so birucì strapié da giuentü,
e miga da menu quii d’abriga alegar a cantà,
a’ se da sigür liger, liger, an fatu da compri,
par la scarsità da franch ca permeteua sól da sugnà.

A’ se cun quach ecezüu cuma al casu dal Kèch,
che ‘ndac´cun an mansöl da uènt,
l’e turnat a cà tüt euforich,
cun la fisarmonica a sa l’era miga bu da sunala.

A la fì, par tüta la setiamana
al trafich l’era par i scingagn,
cun li söi caruani, senza prèsa,
ma cun sosta an dal paes cun la solita storia
da uènt, da cercala, e da predî la fürtüna
©Luisa Moraschinelli
(Lugano-Aprica, Pentecoste 2007)