Abriga.it il giornale quotidiano online di Aprica e della provincia di Sondrio

LA NOSA BEFANA D’AN TEP!

Ma che simpatica quèla nosa befana d’an tep,
che la uignia gio dal camì!
Epür la riuaua a caual d’in s-cua,
e facil al sarà miga stac’
‘nfilas par la cana da l’òlt al bas.
Pür a’ lé, se miga cun l’entusiasmu dal Bambi,
l’era spciada dai tzetasc’ piscinì.
La sa cuntentaua da la còlsa par mèt i sò doni,
ma al problema l’era quala da li còlsi?:
quèla da la mama pü longa, ma pü strecia,
u quèla dal papà pü larga, ma a’ pü cürta??????
I doni era sèmpar quii: mandarì, turù, spagnuleti, caramèli,
tignit cünt che al supermecat dal ciel, an quèl mumènt,
l’era da articui ridoc’ rispet a qui di nos tep moderni.
In ogni modu, a’ la Befana l’era da nò, cun granda gioia, speciada.
Pecat ca la gabi büt ina brüta fama sia cuma nomina,
che da cuma l’era uistida.
Pür nö am la trataua da – sciora - üsandu persinu l’italà,
infati an diseua:
“la bedana vien di notte con le scape tutte rotte,
col vestito alla romana, viva, viva la befana.”
Parlada riservuada sòl ai sciori.
A stu puntu an sa dumanda:
“Che fi arala fac’ la Befana, tignit cünt che, an da li nosi ca’,
al gh’e pü gna al fugulà?”

Luisa Moraschinelli/Epifania 2011:ciao: