Abriga.it il giornale quotidiano online di Aprica e della provincia di Sondrio - al nos dialèt

“Di fuoco e acqua”
An flesch ca fa' riuif la contrada d’abriga

Che buna idea quèla di soci d’abriga.it
da purtà an da la uègia contrada an spetacul da poesia e müsica,
“fuoco e acqua!, ina nuità da fa risüscità i morc’ e fa sugnà.
An da la piazza dal “Zichini” li ós da Gigliola Amorini e Marina Martinelli,
intercaladi da l’Arpa celtica da Laura Albiero
i-à creat ina tal atmosfera da fa desfà fo la get d’an tep.
Nó , che an quèla contrada an se crisüc’ , an m-i-à üdü presènc’:
al Zichini a uignì sü da l’abòlt cun al mèz piè da uì,
par i sö cliénc ‘npegnac’ a fa’ la partida an da l’usteria;
la maestra “Della Morètta” ca la turnaua da la scöla u da la Gesa;,
la Bitina .ca la uignia fo da la cà ilò da banda,
e fac’ sü i stès scalì da l’usteria, ‘ndà, cun i söt è an da la stüua;
al Saù ch’al turnau dal mister da mès cumunal
e la so Teresa sü la finestra a special e a urdà gió.
Ma quèla müsica ‘lascultaua a’ la Pinota a’ se a lèc’ inferma.
Al mancaua miga li “Mutini” sentadi sü la bachina fo da la so cà
cun i tzetasc’ ch’i giraua atoran.
Da la strecia, cun al so tipich pas, al riuaua süa’ al tógn cun la so Dorotea..
Al mancau miga la Mulinera cun i sö, sentc’ sü la baca, fo da ca’.
Ma quèla angelica melodia, l’e riuada a’ a li finestri da la ca’ dal Miliu,
e, a se sèmpar riseruada, la maestra Cioccarelli, l’ha miga pudüt, resist;
piantà ilò da curèsc’ i compic’ di sö tzetasc’ da scòla ,la se mèsa a la finestra a scultà. e uardà.
Da la lobbia ilò sóra, al s’era fac scia a la Cia e al Carlì
E da du pas an giò a la Maria cun al so om, al Barca.
da la finestra da la so cambra, i uardaua e scultaua la nuità.

A stu puntu, an pudeua mi fan a menu da presentà, a stu get d’ótar tep,
i du persunagi presenc’:
all Prefet, gentilmènt uignit da luntù;
ma niènt da nöf an quantu al Sindach: la CARLINA,! üna da ca’.

Luisa Moraschinelli, (fra sogno e realtà) (Aprica, 11/07/2009:ciao: